第一次買樓時的心態，多數會係非常混亂。有的可能會去聽置業講座，但講者話「買樓係投資，要住租就得」，聽完之後，當然係更加混亂。就算想去睇樓，都唔知由邊到開始，要睇啲乜，同預算幾多錢好。
第一層自住樓
前金管局總裁任志剛，就描述得很好，「在香港，如果你沒有自己的房產，那麼你便是在市場中做沽空」，意思係自住嘅一層樓係消費品，如果連這一層都沒有，或將其出售，咁樣同沽空香港樓市沒有什麼分別。
說得白一點，就是如果有能力的話，最好都持有一層自住樓，免得每次通脹一來，又要加租又要搬屋，非常麻煩。老套講句，第時點都好，最少都有瓦遮頭。
所以買第一層樓時，如果真係諗唔掂太多因素，可以先鎖定目標為「搵自住樓」，咁做就可以跳到下一個Step。(當然有更多的玩法，lumyeung高手都有提過，遲啲再講。)
原區揀樓 VS 生流地區
全港有18個地區，如果區區都睇下，相信睇一年，都唔會睇到啲乜。有一種二分法是很適合大部人使用的。第一種，住在父母附近，多一個照應，即在原區揀樓。第二種，可能係想揀升值潛力高一點的區分。
先講第一種，原區揀樓有一個好處，就係由細住到大，邊到有野食，邊到有野買，邊到人流比較「複雜」，邊間學校校風好，全部都會知道，唔洗話經紀講乜就信乜，比較容易知道自己，真係想買那一類單位。另外，亦唔會太在意層樓會唔會升，因為住得近屋企人，就已經係「賺咗」。
第二種，就比較複雜。首先介紹「生流」同「死流」有乜分別。「生流」係指會有外區人搬過去住嘅地方。例子有太古坊落成後，好多後生仔女要去嗰到返工，為咗住近office返工，唔少人會想搬到鰂魚涌到住，形成咗「生流」，學術名詞應該叫外區「需求」。「死流」則完全相反，只有同區客塘水滾塘魚。
隨咗需求外，第二點就要考慮供應。港島區新土地供應已非常有限，九龍區次之，新界區最多，因此形成咗三者的升值潛力有所分別。例如早前有報告，預計明年西貢(包括將軍澳)落成4209伙，元朗3598伙，以及荃灣2164伙，三區供應佔全港三分之二，可以想像到該批單位推出時，市場需要一定的時間才能消化，間接影響該區樓價。
所以要買外區樓，就要鎖定未來有「生流」同較少供應的地區。雖然這兩個因素天天都在改變，但有招有效找出「生流」的方法，就係問身邊將結婚，或搬出去住嘅朋友，最想搬去邊區住，只要問夠10個、20個，就可感受到流向。
而差餉物業估價署每個月都有預計供應量的報告，勤力一點的可以自己查看。懶的，如筆者，等報告出後一至兩天，Google一下就可輕易找到一些別人整理好的精美分析圖片，搞掂。
|